aurora borealis

Norðurljós 23. janúar 2012

24. January, 2012 Leave a Comment

Ég var að keyra heim í gær eftir að hafa séð Contraband og mér sýndist ég sjá norðurljós á himninum. Þegar ég kom heim var ég á bílastæðinu í smá stund að horfa á þessu mögnuðu norðurljós. En svo dreif ég mig upp á þak með þrífótinn og myndavélina.

Þegar ég var kominn upp á þak og búinn að setja allt upp voru norðurljósin ekki alveg eins mögnuð og stuttu áður. En ég náði samt nokkrum fínum skotum af þeim. Fisheye linsan er oft góð þegar ég er að taka myndir af norðurljósum – maður nær að grípa svo mikið af himninum :)

Þetta var frekar magnað kvöld – maður er búinn að sjá nokkra myndir sem fólk var að taka þetta kvöld og það er mikil ljósadýrð. Þær eru reyndar margar teknar aðeins fyrir utan borgina. Þessi aukna norðurljósa-virkni hefur líklega eitthvað með sólargosið að gera.

Norðurljós – Aurora Borealis: February Edition

4. February, 2009 2 Comments

Þegar ég labbaði út úr Borgarleikhúsinu eftir að hafa verið á Sannleikanum með Pétri Jóhanni sá ég þessi mögnuðu norðurljós þvert yfir allan himininn – og nokkuð sterk (kröftugur litur). Það er alltaf gaman að ná myndum af norðurljósum þannig að þegar við komum heim fór ég strax í að búa mig undir norðurljósa-myndatöku í frostinu.

Þegar ég kom út voru norðurljósin strax farinn að dofna en ég náði samt nokkrum góðum myndum – liturinn í þeim jókst aftur í smá tíma og þau voru mikið að dansa um allan himininn.

Ég notaði fisheye linsuna að vissu leyti af því að hún var föst á myndavélina en síðan er hún líka nokkuð heppileg fyrir svona norðurljósamyndir af því að hún nær svo stóru/víðu svæði – upplagt þegar norðurljósin teygja sig svona út um allt. Ég var að spá í að skipta yfir í 35mm linsuna en þá voru norðurljósin eiginlega horfin.

Í þetta skiptið voru þau aðeins sterkari heldur en síðast þegar ég náði myndum af norðurljósunum þannig að það eru þarna nokkrar myndir sem komu aðeins betur út heldur en síðast.

Norðurljós – Aurora Borealis

30. October, 2008 2 Comments

Fyrst maður býr nú á Íslandi er alveg nauðsynlegt að ná nokkrum myndum af norðurljósunum – sem kallast víst Aurora Borealis hjá þeim sem vilja vera fancy. Ég var að fara út með ruslið fyrr í kvöld þegar ég sé norðurljós sem teygðu sig yfir allan himininn… ég þaut inn til að ná í myndavélina og þrífótinn – af því síðast þá hurfu norðurljósin frekar fljótt, eða þau dofnuðu mikið…

Þetta voru nú ekki mjög sterk norðurljós þetta kvöldið (kannski hægt að kenna ljósmenguninni í borginni um) en ég stóð þarna og smellti af nokkrum myndum – meira ruglið, ég sem er búinn að vera með smá kvef og hálsbólgu. Ég meira að segja hljóp inn til að skipta um linsu – prófa hvernig norðuljósin kæmu út í fisheye.

Nokkrar myndir komu ágætlega út en ég held að maður þurfi að fara smá út úr borginni til að taka almennilega norðurljósa-ljósmyndir – maður hefur t.d. séð slatta af þannig myndum frá Þingvöllum.