Danmörk

RIP: Badminton-spaðinn sem ég rústaði í gær

25. March, 2011 Leave a Comment

Ég rústaði badminton-spaðanum mínum í gær. Búinn að eiga hann í 15 ár. Hefur staðið sig vel. RIP. Hann dó með látum – við Hlynur lömdum spöðunum okkar saman í lokaskotinu. En við unnum leikinn þannig að spaðinn dó ekki til einskis.

—

Ég sendi þetta á Facebook í gær en síðan datt mér í hug að það væri sniðugt að hafa þetta líka á blogginu. Gott að geyma svona sögulegar minningar á blogginu. Það er aldrei að vita, kannski gufar Facebook upp úr þurru og þá hverfur allt sem maður hefur lagt blóð, svita og tár í að setja þar inn.

En já, ég fékk þennan Yonex spaða einhvern tíman á tímabilinu 1995-1997, þegar við vorum í Danmörku. Badminton var gríðarlega vinsæl íþrótt þá (hugsanlega ennþá) – mjög margir í bekknum að æfa, þannig að ég skellti mér líka. Fínasta íþrótt. Já, ég fékk spaðann líklega 1996 eða 1997 þar sem þetta var ekki fyrsti badminton-spaðinn minn.

Ég æfði eitthvað smá badminton hjá TBR eftir að við komum heim, en það entist ekki lengi. Þannig að spaðinn var að mestu óhreyfður frá ca. 1998 til 2004 þegar við félagarnir byrjuðum að hittast vikulega og spila badminton (“badda”). Höfum verið með tíma einu sinni á viku á veturna síðan þá, með smá pásu einn veturinn ef ég man rétt. Hópurinn sem hefur verið að mæta hefur breyst smá (eftir því sem fólk hefur farið út í nám eða flutt úr bænum) en ekki mjög mikið.

Baddinn er gríðarlega hressandi. Gaman að stunda svona keppnisíþrótt, ágæt tilbreyting frá hinni líkamsræktinni.

En ég þarf greinilega að fara versla mér nýjan og flottan badmintonspaða. Ég sem var tiltölulega nýbúinn að skipta um net á þessum. En ég er með 2 “vara spaða” sem ég get notað á meðan…

Like a sprained ankle, boy, I ain‘t nothing to play with

Kominn heim

21. December, 2003 Leave a Comment

Jæja, þá er maður loksins kominn heim til Íslands eftir 112 daga dvöl í Danaveldi. Þetta var mjög góð dvöl, ótrúleg lífreynsla, algjörlega frábærar 16 vikur (fyrir utan síðasta kvöldið). Maður lenti í gær eitthvað eftir 16 og fór strax í fríhöfnina að kaupa alskonar góðgæti, gaman það. Síðan fór maður heim þar sem fjölskyldan tók á móti manni með smá óvæntan glaðning: Þau voru gjörsamlega búin að breyta herberginu mínu! Þau nýttu s.s. tíman á meðan ég var í burtu til að t.d. setja falskt loft með halogen ljósum, rífa út hluta af veggnum og skella stórum glugga þar, mála herbergið hvítt (það var dökkgult og ljósgrátt – góð breyting) og endurskipuleggja herbergið smá. Þetta voru allt jákvæðar breytingar og er ég bara nokkuð sáttur – ég held að þetta sé smá trick hjá þeim til að halda mér heima örlítið lengur ;)

Við Bjössi skelltum okkur síðan um kvöldið á alvöru íslenskt djamm, gaman að prófa það aftur. Höfðum við heyrt að nokkrir fyrrverandi verzlingar væru að fagna próflokum/afmælum á Felix og skelltum við okkur þangað. Þetta reyndist verða nokkuð gott kvöld, góð stemmning og virkilega gaman að hitta gömlu skólafélagana aftur. Þótt við Bjössi værum komnir í íslensku stemmninguna þá héldum við okkur smá í danska stílin og sötruðum bara Tuborg – Bjössi greip mig meira að segja að biðja um Tuborg með dönskum hreim, verð að laga það ;) Eftir djammið var náttúrulega leiðinni haldið að Bæjarins Bestu sem mig er búið að dreyma um í tæplega 4 mánuði – klárlega bestu pylsurnar í heimi – alsæla : )

Gaman að vera kominn heim, nú er bara að komast í ekta íslenskt jólaskap.

Helvítis dópistinn sem stal…

20. November, 2003 1 Comment

…fartölvunni minni má brenna í helvíti!!!

Einhver djös, helvítis, ógeðslegur, heimskur dópisti var að stela fartölvunni minni!!! …og líka GSM símanum mínum og öllum peningunum sem voru í veskinu mínu! Það voru s.s. einhverjir helvítis vitleysingar sem gengu berserksgang hérna í skólanum og gengu herbergi í herbergi og tóku allt verðmætt: GSM símar, tölvur, myndavélar, video camerur, o.s.frv… Allar fucking 4000 myndirnar sem ég er búinn að taka hérna eru horfnar!!!

Þetta var s.s. MaxData Vision FX460T fartölva, seríal númer: 30137020027 – silfurgrá að lit, 14.1″ skjár, ca. 3 kg og hún var í svartri fartölvutösku ásamt tölvumús, þráðlausu netkorti, o.s.frv…
>> Fundarlaun: 2.000 DKK , 25.000 ISK

Síminn: SonyEricsson T68i – blá/grár

Púff…. ok, búinn að fá smá útrás.
Megi sá sem tók tölvuna mína og allir þeir sem að þessu komu brenna í helvíti!!!
– það er svo bókað að það var einhver hérna innan skólans sem var með í þessu – sagði þeim frá því að það væri kveðjuveisla og allir væru í matsalnum!

Löggan er búin að koma og taka skýrzlu þannig að það er allt í gangi og síðan er maður búinn að skrá þetta á crime-on-line.com. Pirrandi þegar það er rosalega lítið sem maður getur gert!

[hmm… 20. nóvember? Er það rétt? Skrifaði ég þetta ekki meira svona 20. desemeber?]
[Já, þetta er s.s. tekið af gamla Brinkster blogginu mínu í gegnum Wayback Machine]

Þetta er allt að gerast!!!

19. November, 2003 Leave a Comment

Damn, aðeins “örfáir” klukkutímar eftir hérna í Danmörku. Við erum hérna að snæða góða kveðjukvöldverð og erum bara að bíða eftir eftirréttinum.
Við erum búnir að vera taka til í herberginu okkar nokkurn veginn í allan dag (frá hádegi) og það tók á – við erum virkilega duglegir að rusla til. En þetta er loksins búið og við hljótum að fá depositið okkar (1000 DKK).

Sjáumst bara hress á klakanum.
Over and out…

Ich bin ein Hamburger

13. October, 2003 Leave a Comment

Við komum heim í gær um 23-leytið og myndi ég segja að þetta hafi verið nokkuð vel heppnuð ferð (fyrir utan að það var stolið af okkur 2 mörkum!).

Á föstudaginn tókum við s.s. strætó kl. 14:47 á lestarstöðina og síðan lest til Köben. Eftir það var síðan ca. 6 klst. í rútu. Rútan var ekki svo slæmur ferðamáti, ágætt fótapláss – það hjálpaði líka aðeins að 45 mín af þessum 6 klst. var í ferju milli DK og DE. Síðan var það bara leigubíll að hótelinu og er ég bara nokkuð sáttur við það miðað við að við borguðum bara 7.000 ISK á mann fyrir 2 nætur. Herbergið var nokkuð flott – mikið stökk frá herberginu í Grundtvig ; ) – gott rúm, mjúkur koddi, góður hiti á herberginu, fín sturta þar sem ég gat staðið uppréttur og maður þurfti ekki alltaf að hafa áhyggjur af því að niðurfallið myndi flæða yfir. Morgunmaturinn var líka mjög góður – ekta þýskt morgunverðar-hlaðborð, sáttur við það.

Fyrir leikinn skelltum við okkur í bæinn að versla smá. Ég keypti mér peysu í H&M og skellti mér auðvitað á Matrix Reloaded ásamt GoodFellas, El Mariachi & Desperado og Linkin Park – Meteora í Karstadt.

Síðan var það leikurinn… við tókum leigubíl á AOL Arena, sem var aðeins lengra í burtu en við héldum – okkur var ekki að fara lítast á blikuna þegar við sáum ekkert nema tré í kringum okkur en völlurinn er s.s. í miðjum skógi. Þetta var alveg rosalegur völlur – risastór – þótt maður vissi að hann tæki 50.000 manns þá gat maður ekki alveg ímyndað sér svona stærð. Ég er nú ekki mesti fótbolta-áhugamaður í heimi en þetta var geðveik stemmning – það er náttúrulega rafmagnað andrúmsloft sem 50.000 manns get skapað. Íslendingar skoruðu 2 glæsileg mörk sem var bara stolið af okkur – ekki sáttur við það!
Eftir leikinn eltum við einhverja Íslendinga og enduðum í Stebba Hilmarz & Co. partý þar sem “eldra fólkið” réð ríkjum.
Við tókum fullt af myndum og nokkur video sem birtast hérna þegar ég kemst í það.

Nenni varla að skrifa meira – ef þið viljið ítarlegri frásögn þá er Bjössi búinn að blogga hérna.

Nezi bara byrjaður að blogga..

17. September, 2003 Leave a Comment

Jæja, þá er að sjá hvort að snilldin hans Bergs virki hjá mér… Þetta er náttúrulega brillíant kerfi og mæli ég með að allir skelli sér á svona græju >> Expresso!

Eins og sumir vita er ég s.s. núna staðsettur í Danmörku, nánar tiltekið í lýðháskóla í Hillerød. Ég verð hér fram að jólum og hef skemmt mér bara ágætlega hingað til.

Ég er einnig aðili að öðru bloggi þar sem við Bjössi bloggum saman um tilveru okkar hér í Danmörku, en ég ætla að nota þetta pláss aðallega til að birta myndir sem ég hef tekið og til að varpa áliti mínu á heiminn.

Nóg í bili… ég ætla aðeins að fara að stússast í Expresso og læra á þetta.