ljósmyndun

Mánuður af Hannesi – Everyday verkefni í vinnslu

17. May, 2011 3 Comments

Fyrir tæpum tveim mánuðum keypti ég Everyday app-ið. Ég er búinn að fylgjast lengi með Noah Kalina – hann er einn af mínum uppáhalds ljósmyndurum – og mér finnst Everyday verkefnið hans nokkuð skemmtilegt/áhugavert.

Þannig að mig langaði til að prófa að gera svona myndband (time-lapse video) af mér yfir nokkurn tíma.

Hérna er fyrsti mánuðurinn – 21. mars 2011 til 22. apríl 2011:

Frekar stutt… ég þarf að taka mynd af mér á hverjum degi í nokkra mánuði í viðbót til að geta búið til aðeins áhugaverðara myndband ;)

Já, ég notaði Vimeo app-ið til að skella title credits á þetta og tónlist undir. Ótrúlegt hvað maður getur gert með iPhone ;)

Remember when I caught your eye. You gave me rainbows and butterflies.

Tunglmyrkvi 21. desember 2010

26. December, 2010 Leave a Comment

Það var víst tunglmyrkvi um daginn. Síðasti tunglmyrkvi sem sást á Íslandi var þann 21. febrúar 2008 og næst verður það eftir tæplega ár eða 10. desember 2011 (hann mun samt ekki sjást almennilega frá Reykjavík af því að almyrkvinn hefst þegar enn er dagsbirta á Íslandi). Þetta var stysti dagur ársins og alles… víst voða merkilegt, það er talað um að það séu 400-500 ár síðan það gerðist síðast.

Ég reif mig á fætur og tók nokkrar myndir. Náði reyndar takmörkuðum myndum með 55mm aðdráttarlinsunni minni en síðan fékk ég 135mm linsu lánaða hjá bróður mínum og þá náði ég aðeins skýrari/betri ljósmyndum.

Ég hef ekki mikið verið að taka myndir af tunglinu áður… Það voru greinilega smá mistök hjá mér að taka mjög “langar” myndir (þar sem ljósopið var opið í margar sekúndur) – þá eru tunglið og stjörnurnar hreyfð. Samt smá áhugavert að sjá húsin alveg kyrr á meðan himinninn er á hreyfingu. Ég vildi ekki þurfa að hafa ISO-ið of hátt þannig að myndirnar yrðu mjög kornóttar og þess vegna þurfti ég að hafa ljósopið opið svona lengi. En maður þarf greinilega að finna einhvern milliveg. ISO 3200 á Canon 550D er reyndar allt í lagi fyrir svona myndir af tunglinu.

Það virðist sem 5 sekúndur (eða minna) sé heppilegur tími – ef ljósopið er opið mikið lengur en það þá er áberandi hreyfing á myndinni. Síðan er bara um að gera nota ljósnæmustu stillinguna á linsunni – ég græddi voða lítið á að nota f/5.6 á 17-55mm linsunni þegar ég gat notað f/2.8.

Þetta var ekki heppilegt veður til þess að vera standandi úti lengi í kuldanum. Sérstaklega ekki þegar maður er smá veikur. En ég stillti bara þrífætinum upp rétt fyrir utan útidyrnar og hoppaði inn á milli ;)

Afmæli 2009 – legendary partý

28. July, 2009 2 Comments

Ég átti víst afmæli um daginn og það vill svo skemmtilega til að Einar á afmæli tveim dögum áður – þannig að okkur fannst alveg tilvalið að slá nokkrar barflugur og halda partý saman. Við buðum slatta af liði og hellingur mætti og úr því varð alveg fínasta teiti.

Ég var auðvitað með eina eða tvær myndavélar á lofti – það þarf að festa svona snilld á filmu. Ég var reyndar frekar fljótur að skipta yfir í fisheye linsuna þar sem hún var mun heppilegri í þessum aðstæðum – maður hafði ekki mikið svigrúm til að bakka til að ná fleirum inn í rammann. En fisheye er náttúrulega bara meira partý :)

Þar sem mér finnst yfirleitt skemmtilegri myndir þar sem er ekki notað flass þá hafði ég oftast ekki kveikt á því – en þar sem birtan var ekki alveg nægileg þá hafði ég linsuna stillta á ljósnæmustu stillinguna (f/2.8 á fisheye) og setti ISO í 12800 sem er náttúrulega rugl (maður hefur ISO yfirleitt 100 til 400). Svona hátt ISO skilar sér í töluverðu noise – en það sakar ekki, betra en ná ekki þessum myndum (ég hefði t.d. ekki getað stillt svona hátt ISO með gömlu vélinni). Síðan hefði ég líka verið fljótur að klára batterýið ef ég hefði notað flass á þessar 450+ myndir ;)

Ég var s.s. með ljósopið stillt á f/2.8 og það þýðir að fókuspunkturinn er frekar skarpur – allt lengra/styttra frá fókuspunktinum verður s.s. blurrað/úr fókus. Síðan virðist sem auto focus-inn hafi ekki alveg verið að virka nógu vel í svona takmarkaðari lýsingu (var ekki auðveldlega að grípa einhvern flöt til að fókusa á).

OK, fólk botnar kannski ekkert í hvað ég er að bulla ;) En ég er bara að punkta þetta hjá mér til að geta kannski tekið betri myndir næst.

Svona eftir á að hyggja hefði kannski verið heppilegt að nota flass í fleiri tilfellum, samt ekki víst – en maður er alltaf að læra, tekur smá tíma að læra inn á þessa nýju vél.

En ef ég ætla að gera eitthvað meira af því að taka svona partýmyndir þá þarf ég hugsanlega að fjárfesta í svona mega-flassi sem (að mér skilst) skilar jafnari og skemmtilegri birtu heldur en innbyggða flassið.

En ég vil þakka fyrir mig og þakka þeim sem komu – þetta var snilldar partý. Svona á sko að halda partý – þótt ég segi sjálfur frá ;)

Restin af myndunum ætti að detta inn á komandi dögum.